Euskal Filologian doktorea da, Heziketa Fisikoan lizentziatua, eta Piano eta Kantuko ikasketak ere eginak ditu. Egile polifazetiko eta arrakastatsu honek aspalditik du ogibide idaztea, bere bidaia eta liburuei buruzko hitzaldiak ematen ditu, eta opera kantatzen ere aritu da. Sortu dituen hogeita hamataka liburuen artean, bidaia-narrazioak (7 kolore, Tubabu, Oroituz, Griot…), haur eta gazte literatura (Harresi handirantz, Beti iparralderantz, Trumoiaren alaba, Lurraren taupadak…) eta nobela beltzak dira nagusi. Azken genero honi dagozkio Xahmaran, Tangerko Ametsak, Arrutiren banda eta telesail bihurtu berri diren Touré igarle-ikertzailearen saileko hamaika nobelak, lehenengoa 19 Kamera eta azkena Zenbaki gorriak. Txerriak eta loreak ere genero beltzekoa da, euskal noir hutsa.